ဦးသုခသည် စာရေးဆရာ၊ အကယ်ဒမီ ၆ ဆုရ ရုပ်ရှင် ဒါရိုက်တာ၊ အဆိုတော်၊ တေးရေးဆရာ၊ ဘာသာရေးဟောပြောသူ၊ မြန်မာပြည်တွင် အမေနေ့ကျင်းပရန် ဆော်သြခဲ့သူဖြစ်သည်။ စွယ်စုံရ ထူးချွန်သည့် ပါရမီရှင်ကြီး တစ်ဦးဖြစ်သည်။
ငယ်ဘ၀
၁၉၁၀ပြည့်နှစ်၊ ဇန်န၀ါရီလ(၁၄)ရက်၊ (၁၂၇၁-ခု၊တပို့တွဲလဆန်း(၅)ရက်၊သောကြာနေ့)တွင် ကျိုက်လတ် အပိုင်၊ စာဖြူစုကျေးရွာသူကြီး ဦးစံခိုင်၊ ဒေါ်မျှင်တို့မှ ဖွားမြင်သည်။ သာသမီး(၄)ယောက်အနက် အကြီးဆုံးဖြစ် သည်။ ငယ်မည်မှာ မောင်သိန်းမောင် ဖြစ်သည်။
ပညာရေး
၁၉၂၆ - ကျိုက်လတ်မြို့၊ အမျိုးသားကျောင်းမှ အလယ်တန်း အောင်မြင်ခဲ့သည်။
၁၉၂၇ - ဖျာပုံအမျိုးသားကျောင်းသို့ ပြောင်းရွှေ့ကာ အထက်တန်းပညာသင်ယူသည်။ အလယ်တန်းမှစ၍ ကဗျာ၊ ရတုများရေးသားစပ်ဆိုလာခဲ့ရာ အထက်တန်းကျောင်းသားဖြစ်လာသောအခါ ၀တ္ထုရေးရန် စိတ်သန်လာသည်။ ၉-တန်းအရောက်တွင် ကျောင်းမှထွက်ကာ ဖခင်ဦးစံခိုင်၊ ရန်ကုန်တွင်တည်ထောင်သော 'အာဇာနည်ဂျာ နယ်' တိုက်တွင်လုပ်ရန် ရန်ကုန်သို့ထွက်ခွာခဲ့သည်။ ဂျာနယ်ပိတ်လိုက်ရသဖြင့် ကျိုက်လတ်ပြန်ခဲ့သည်။ ကျိုက်လတ်ပြန် ရောက်သောအခါ ကျိုက်လတ်ဆရာကြီးဦးဘမူ၏ အမျိုးသားကျောင်းတွင် မြန်မာစာပြဆရာအဖြစ်ဆောင်ရွက်ရင်း အမျိုးသားအောင်ပွဲနေ့များတွင် ကျင်းပသည့် ပဒေသာကပွဲများအတွက် ဇာတ်လမ်းရေးပေး၊ ကိုယ်တိုင်လည်းပါဝင် ကပြ၊ ဒါရိုက်တာလည်းလုပ်ခဲ့သည်။
၁၉၂၉ - စိန်သိန်းတန်အမည်ဖြင့် စံပယ်ပွင့် ၀တ္ထုရေး၊ က၀ိမျက်မှန်မဂ္ဂဇင်းတွင် ဖေါ်ပြခံရသည်။ စာမူခငွေ (၁၀ိ/-)နှင့် မဂ္ဂဇင်း(၆)လဆုရရှိခဲ့သည်။
၁၉၃၀ - ပြည့်နှစ်တွင် ရွှင်ပျော်ပျော်တိုက်ဝတ္ထုပြိုင်ပွဲ၌ မောင်သိန်းမောင်အမည်ဖြင့် မိန်းမသား ၀တ္ထုရွေးချယ် ခံရသည်။
၁၉၃၂ - အသက်(၂၃)နှစ်အရွယ်တွင် ဖတ်ခဲ့မှတ်ခဲ့သော လောကီလောကုတ္တရာဆိုင်ရာ မှတ်စုများကို စတင်စု ဆောင်းရေးသား(နောင်တွင် သုခမှတ်စု စာအုပ်ထွက်ခဲ့)သည်။
၁၉၃၄ - ရွှင်ပျော်ပျော်တိုက်နှင့် လိုက်ဖက်အောင်သုခအမည်ခံယူ။ သုခအမည်ခံယူပြီးနောက်တွင် ၀တ္ထု အဆုံး၌ သုခိအတ္တာနံပရိဟရန္တု ဆုတောင်းကိုထည့်လေ့ရှိ။ ရွှင်ပျော်ပျော်တိုက်အတွက် လုံးချင်းဝတ္ထုငယ်များ ရေး သားခဲ့။ မိုက်မိတယ် လုံးချင်းထွက်ရှိသည်။
ရုပ်ရှင်လောကသို့ ဝင်ရောက်ခြင်း
၁၉၃၈ - ချစ်အမျှ ရုပ်ရှင်ဇာတ်ညွှန်းကို ရေးသား၍ ရုပ်ရှင်လောကသို့ ၀င်ရောက်ခဲ့။
၁၉၄၂ - ဂျပန်ခေတ်တွင် ပြဇာတ်များကို ရေးသားတင်ဆက်ခဲ့။ ကန်တော်မိတ်ရုံတွင် ဂုဏ်။ ဂျိုတီရုံတွင် မေတ္တာနှင့်သစ္စာ မြိုင်ရုံတွင် သြော်မိန်းမ - သြော်ယောင်္ကျား မိန်းမနဲ့ယောင်္ကျား သြော် --- လောက ပြဇာတ် များတင်ဆက်ခဲ့။ စာရေးဆရာအသင်း ရံပုံငွေအတွက် ၀ိဇယ 'ပေါ်ဦး' ပြဇာတ်များတွင် ဒါရိုက်တာလုပ်၊ ကိုယ် တိုင်ပါဝင်ကပြခဲ့။ မောင်ဖေငယ် ပြဇာတ်အထူးလူကြိုက်များခဲ့။ နောက်ပိုင်း ကာဌေးရုံးတွင် ချစ်တော့ချစ်တယ်၊ ၀သုန်ဤမြေ၊ ၀င်းဝင်းရုံတွင် ကိုယ်ကြိုက်တာကိုယ်လုပ် ဇော်ရုံတွင် သားတိုးရုပ်ရည်ပြဇာတ်များကို ကိုယ် တိုင် အဓိကဇာတ်ဆောင်နေရာမှ ပါဝင်ကပြခဲ့။
၁၉၄၈ - ချစ်အနုမြူ ရုပ်ရှင်ဇာတ်ကားကို ဒါရိုက်တာအဖြစ် ပထမဆုံးရိုက်ကူး (ထိုကားအတွက် စာရေးဆရာ အသင်းက ချီးမြင့်သော ဂုဏ်ထူးဆောင်ရွှေတံဆိပ်ဆုရခဲ့)။
၁၉၅၁ - သုခ၀တ္ထုတိုပေါင်းချုပ် စာအုပ်ထွက်။ (ထိုစာအုပ်ကို ၁၉၅၅၊ ၁၉၆၆၊ ၁၉၇၈၊ ၁၉၈၈ ခုနှစ်များတွင် ပြန်လည်ရိုက်နှိပ်ခဲ့)။
၁၉၅၄ - သြော်မိန်းမဇာတ်ကားရိုက်။ (အကယ်ဒမီ ဒါရိုက်တာဆုရ)။
၁၉၅၆ - ဘ၀သံသရာဇာတ်ကားရိုက် (အကယ်ဒမီ ဒါရိုက်တာဆုရ)။
၁၉၅၇ - ၆၇ - ရုပ်ရှင်နယ်၊ စာပေနယ်တွင် ကျင်လည်စာအုပ်များရေးသားထွက်ရှိ၊ ဗုဒ္ဓဘာသာတရားတော်ကို စွဲ မြဲစွာယုံကြည်ရင်းရှိသဖြင့် (နောင်တွင် ရဟန်းစားရသော ဆွမ်းတစ်နပ်၊ တစ်ပါးသီလ၊ ရုပ်မြင်သံကြားဇာတ် လမ်းများရေးသား ရိုက်ကူးခဲ့)။
၁၉၆၈ - စကားပြောသောအသည်းနှလုံး ဇာတ်ကားရိုက် (အကယ်ဒမီ ဒါရိုက်တာဆုရ)။
၁၉၇၀ - ကျမမှာမိန်းမသား ဇာတ်ကားရိုက် (အကယ် ဒမီ ဒါရိုက်တာဆုရ)။
၁၉၇၃ - ဘယ်သူပြိုင်လို့လှပါတော့နိုင် ဇာတ်ကားရိုက်(အကယ်ဒမီ ဒါရိုက်တာဆုရ)။
၁၉၇၅ - ရွှေခြည်ငွေခြည်တန်းပါလို့ ဇာတ်ကားရိုက် (အကယ်ဒမီဒါရိုက်တာဆုရ)။
၁၉၈၃ - ၈၄ - ရန်ကုန်တိုင်း၊ ကျောင်းထိုင်ဘုန်းကြီးသင်တန်းကျောင်း၊ တက္ကသိုလ်ဆရာလောင်း မွန်းမံသင် တန်းတို့တွင် စကားပြောဟောနည်းပညာ၊ တရားဟောနည်းပညာ ဘာသာရပ်ပို့ချခဲ့။
၁၉၉၄ - ရာမာခရစ္စနာ၏ သုတ္တပုံပြင်များစာအုပ်ထွက်။
၁၉၉၄ - ဇန်န၀ါရီလ(၄)ရက်နေ့တွင် မဟာသဒ္ဓမ္မ ဇောတိက ဘွဲ့တံဆိပ်ကို ချီးမြင်ခြင်းခံရ။
၁၉၉၅ - ရတနာသုတ်စာအုပ်ထွက် မင်္ဂလသုတ် (စတုတ္ထ အကြိမ်)ထွက်။
၁၉၉၇ - ချယ်လီအလှစာအလှ၊ စိတ်ဆိုသောစိတ်၊ သုခမှတ်စု၊ သုတရသဓမ္မစာစုံ၊ အမေ စသောစာအုပ်များ ထွက်။
၁၉၉၈ - ဇေယျတုသဗ္ဗမင်္ဂလံ၊ ဓမ္မရသ၊ လောကနီတိ၊ အကျော်ဒေးယျ၊ ဗုဒ္ဓသမီးတော်များ စသောစာအုပ်များ ထွက်။
၁၉၉၉ - ကံကံ၏အကျိုး၊ မေတ္တာသုတ် စာအုပ်များထွက်။
၂၀၀၀ - ပြည့်နှစ် သုခနှင့်သုခ စာအုပ်ထွက်။
၂၀၀၁ - အောက်တိုဘာ(၂၆)ရက်တွင် ရန်ကုန်တက္ကသိုလ်မှ ဂုဏ်ထူးဆောင်စာပေပါရဂူဘွဲ့ အပ်နှင်း။ ချီးမြင့် ပဒေသာ၊ သဗ္ဗေသတ္တာ စာအုပ်များထွက်။
စာရေးဆရာ ဒါရိုက်တာကြီးဦးသုခသည် ၂၀၀၅-ခုနှစ်၊ ဒီဇင်ဘာ(၇)ရက်နေ့ ဗုဒ္ဓဟူးနေ့မနက် ၁၁း၃၀့နာရီတွင် အမှတ်(၂) စစ်ဆေးရုံ၌ ကွယ်လွန်ခဲ့။
ပါဝင်ဆောင်ရွက်ခဲ့သော အဖွဲ့အစည်းများ
ဗုဒ္ဓဘာသာ ကလျာဏ ယုဝအသင်း (၀ိုင်အမ်ဘီအေ)နာယက
စေတီယင်္ဂဏအသင်း၊ နာယက
တိပိဋက နိကာယသာသနာပြု ဥပဌာကအဖွဲ့ ဂုဏ်ထူးဆောင်နာယက။
တိ-နိ စာအုပ်စာပေ အနုပညာနှင့် မော်ကွန်းအဖွဲ့ နာယက
နာရေးကူညီမှုအသင်း (ရန်ကုန်)နာယက
ဆရာကြီးဦးသုခသည် လုံးချင်းဝတ္ထုပေါင်း (အစောပိုင်းကာလက) ၁၀၀မျှရေးခဲ့၍ ၀တ္ထုတိုပေါင်း(၂၀၀)ခန့် ရေး သားခဲ့သော်လည်း နောက်ပိုင်းတွင် ဘာသာရေးဆိုင်ရာများကိုသာ ဦးစားပေးခဲ့သည်။ ရုပ်ရှင်ကားပေါင်း (၃၃)ကား မျှ ဒါရိုက်တာလုပ်၍ ရိုက်ကူးခဲ့သည်။
ရရှိခဲ့သော ဘွဲ့ထူးဂုဏ်ထူးများ
အကောင်းဆုံး ဒါရိုက်တာဆု (၆)ဆု = (၁၉၅၄၊ ၁၉၅၆၊ ၁၉၆၈၊ ၁၉၇၀၊ ၁၉၇၃၊ ၁၉၇၅)
အလင်္ကာကျော်စွာ = (၁၉၅၈) ရုပ်ရှင်ဝါသနာအိုးများ၏ သူရဿတီရုပ်တု = (၁၉၆၀)
မဟာသဒ္ဓမ္မဇောတိကဓဇ = (၁၉၉၄)
ပခုက္ကူ ဦးအုံးဖေ တစ်သက်တာစာပေဆု = (၁၉၉၄)
အာဆီယံစာပေဆု = (၁၉၉၇)
ကျေးဇူးသစ္စာ မြတ်ဘဏ္ဍာ ဂုဏ်ပြုဆု = (၁၉၉၉)
လူမှုထူးချွန် (ပထမအဆင့်) = (၂၀၀၀)
ဝိဇ္ဇာပညာထူးချွန်တံဆိပ် (ပထမအဆင့်) = (၂၀၀၀)
ဂုဏ်ထူးဆောင် စာပေပါရဂူဘွဲ့ Ph.D = (၂၀၀၀)
ဓမ္မဗိမာန် တစ်သက်တာစာပေဆု = (၂၀၀၅)
ထင်ရှားသည့်စာအုပ်အချို့
-သုခမှတ်စု -အကျော်ဒေးယျ ဗုဒ္ဓသမီးတော်များ
-မင်္ဂလသုတ်(အဖွင့်)
-မေတ္တသုတ်
-လောကနီတိ
-သုခ၀တ္ထုတိုပေါင်းချုပ်
-ရာမာခရစ္စနာပုံပြင်များ
-ကံကံ၏အကျိုး
-ချယ်ရီအလှစာအလှ
-သုတရသဓမ္မစာစုံ
-စိတ်ဆိုသောစိတ်
No comments:
Post a Comment